85 sm urriði á land í Ytri Rangá

Veiðin í Ytri Rangá er búin að vera afskaplega góð síðustu daga og það hafa verið að koma um 100 laxar á land á hverjum degi.

En það veiðist fleira í Ytri Rangá en bara lax.  Það er sterkur urriðastofn í ánni sem er bæði stór og kröftugur en fáir hafa þó komið á land síðustu ár sem jafnast á við urriðann sem veiddist í gær.  Það var erlendur veiðimaður sem veiddi hann undir leiðsögn Bjarka Más Jóhannssonar og tók þessi flotti fiskur létta klædda Silver Sheep túpu.

Í Ytri Rangá má finna bæði staðbundinn urriða og sjóbirting sem veiðist oft best síðsumars og þá helst á neðstu svæðunum í henni en hann er yfirleitt um 5-10 pund að stærð og er líkelga einn skemmtilegasti fiskurinn sem hægt er að fá á færi að margra mati en sjóbirtingurinn getur oft verið mjög tökuglaður.  Staðbundni urriðinn er hins vegur mjög vandfýsinn á agn og erfitt að fá hann til að taka svo það er einstakt að jafn stórir fiskar eins og þessi sem sést á myndinni sjáist hvað þá veiðist.