Telja sig vita hvar Louise er

Lögreglan á Suðurnesjum telur sig vita hvar Louise Soreda, franska konan sem leitað hefur verið að, er. Lýst var eftir henni í gær en hún fór frá heimili sínu í Frakklandi 4. júlí síðastliðinn og sást í framhaldinu á öryggismyndavélum á Keflavíkurflugvelli.

Talið er að hún hafi pantað sér ferð hjá ákveðnu ferðaþjónustufyrirtæki og er staðfestingar þess efnis nú beðið. Ekki hafa fengist uppgefnar upplýsingar um hvar á landinu hún á að vera stödd.

Greint var frá því á Vísi í morgun að Louise hefði gist í tvær nætur á gistiheimili í Vesturbæ Reykjavíkur, eftir komu hennar hingað til lands. Hún er sögð hafa verið þar með karlmanni en ekki er vitað hver maðurinn er. Louise kom ein hingað til lands fyrir átta dögum. Hún var aðeins með miða aðra leið.

Lögreglan segist ætla að senda frá sér tilkynningu þegar frekari upplýsingar liggja fyrir.