87 sm hrygna sem lét hafa mikið fyrir sér

Eins og veiðimenn þekkja vel geta komið upp ýmsar aðstæður þegar verið að þreyta lax þar sem laxinn getur tekið upp á ýmsu til að reyna losa sig við krókinn.

Heiðar Valur Bergmann er við veiðar í Langá ásamt föður sínum Atla Bergmann og það er óhætt að segja að þeir hafi lent í áskorun þegar þeir voru við veiðar á svæði 1 í morgun.  Heiðar var að kasta á Breiðuna (nr.9) þegar vænn lax tekur og snýr sér fljótlega við og skellir sér í hylinn fyrir neðann og þá fyrst byrjar vesenið.

"Laxinn tók á miðri Breiðunni og skellti sér í Myrkhylin sem hún lagðist í nokkra stund. Eftir það þá straujaði hún niður og undir brúna. Pabbi stökk til og hljóp yfir veginn og niður á veiðistaðinn Horn þar sem hann stóð eins og markmaður og við það loksins stoppar laxinn.  Ég átti ekki annað í boði en að fara undir brúnna sem er ekki æfing sem ég mæli með og þar sem ég kem úr klöngrinu undan brúnni og upp á klettana með hjôlið á umdirlinu þá tekur hún strauið aftur upp neðri breiðuna. Eftir 20 mín tog þá háfaði faðir Bergmann þessa 87cm hrygnu í silungaháfin af dýrari gerðinni.  Þetta var kannski erfitt að mikið rosalega var þetta gaman".

Eins og myndin ber með sér var þetta falleg 87 sm hrygna sem var gefið líf að lokinni viðeign.  Í hollinu á undan var jafn stórri hrygnu landað af Óskari Haukssyni en sá fiskur tók þegar aðeins 5 mínútur voru eftir af veiðitímanum.  Þetta var maríulax hjá Óskari og það er nú ekki leiðinlegt að byrja veiðiferilinn á svona flottum laxi.