42 laxar í opnun á Stóru Laxá svæði 4

Stóra Laxá á ótrúlega dyggan aðdáendahóp sem heldur mikla tryggð við þessa fallegu á enda er það ekkert skrítið þegar veiði og fagurt umhverfi fer saman.

Þeir sem voru að störfum við að merkja ánna voru þegar farnir að hafa orð á því að töluvert af laxi væri farinn að sýna sig á svæði 4 vikuna áður en veiði hófst og eins og Stóra Laxá á til voru þetta allt vænir laxar.  Það kom enda á daginn þegar veiði hófst að það var mikið gengið enda sýndu veiðitölur í lok hollsins það ágætlega en 42 löxum var landað á tveimur og hálfum degi sem er líklega ein besta opnun í Stóru Laxá svæði 4 eða jafnvel í allri ánni.

Veiðin samanstendur af fallegum og vænum tveggja ára laxi en aðstæður í Stóru hafa verið frábærar.  Vatnsstaðan er góð og veður hið ágætasta til veiða.  Svæði eitt og tvo opnuðu í gær og var heldur rólegra á þeim velli en þar komu aðeins fjórir laxar á land.  Því hefur verið haldið fram að það séu tveir stofnar í ánni.  Annars vegar þessi snemmgengni sem mætir um miðjan júní og æðir upp á efri svæðin án þess að staldra mikið´við á neðri svæðunum.  Síðan er talið að hinn stofninn sé sá sem fyllir neðri svæðin oft síðsumars er þegar þessar víðfrægu haustgöngur koma þá er veiðin í ánni í einu orði sagt alveg biluð.