"Eðlileg" byrjun í Ytri Rangá

Ytri Rangá byrjaði með látum í fyrra og það var þess vegna mjög spennandi að sjá hvernig hún færi af stað á þessu ári.

Byrjunin núna var öllu rólegri en það er samt ekkert hægt að tala um rólega byrjun heldur frekar að byrjunin hafi verið eðlileg.  Aðeins var veitt á tólf stangir fyrstu dagana og heildarveiðin er 90 laxar á þeim tíma.  Stærsti laxinn sem er kominn á land er 90 sm en það hafa nokkrir stærri sloppið og eins sást töluvert af stórum laxi sveima um í Ægissíðufossi án þess að taka flugur veiðimanna en vanir menn við Ytri Rangá sáu marga sem eru um 100 sm í þessari torfu.

Ytri Rangá er feykilega vel seld í sumar og nú þegar er farið að bera á því að veiðimenn séu að tryggja sér daga strax næsta sumar þrátt fyrir að þessi vertíð sé bara nýfarin af stað.  Þetta sýnir glögglega hversu vinsælar Rangárnar eru en það eru líklega fáar ár í Evrópu sem skila jafn mörgum löxum á land á ekki fleiri stangir en veiða mest í einu í ánni.