Íran komið með farseðil til Rússlands

Íran verður á HM í Rússlandi næsta sumar en Íran er frekar óvænt aðeins önnur þjóðin sem fær farseðil til Rússlands.

Farseðilinn fengu Íranir er þeir lögðu Úsbekistan, 2-0, í gær. Þetta er í annað sinn í röð sem Íran fer á HM en það hefur aldrei gerst áður.

Fyrsta þjóðin til þess að tryggja sig inn á HM var Brasilía.

Portúgalinn Carlos Queiros er augljóslega að gera flotta hluti með Íran sem hann hefur stýrt síðan árið 2011.

Þar áður var hann aðstoðarmaður Sir Alex Ferguson hjá Man. Utd og síðar aðalþjálfari Real Madrid og landsliðsþjálfari Portúgal.