Eiginkona Brady kjaftaði af sér

Brasilíska fyrirsætan Gisele Bündchen kom eiginmanni sínum, NFL-stjörnunni Tom Brady, í bobba með viðtali sem birt var á CBS í gær.

Þar sagði Gisele að Brady hefði fengið heilahristing á síðasta ári og að hann fengi heilahristing á hverju ári.

Samkvæmt gögnum NFL þá hefur Brady aldrei fengið heilahristing en slík meiðsli eru tekin mjög alvarlega í deildinni. Þeir sem fá heilahristing þurfa að gangast undir skoðanir og síðan fá leyfi til þess að spila á nýjan leik.

Forráðamenn NFL-deildarinnar hafa því haft samband við leikmannasamtök deildarinnar til þess að rannsaka þetta mál.