„Þjálfarinn viðurkenndi 20 þúsund evrur á dómarana“

Eins og ítarlega hefur verið fjallað um íhuguðu Valsmenn að kæra úrslit leiks liðsins gegn Potaissa Turda í undanúrslitum Áskorendakeppni Evrópu í gær.

Hlynur Morthens, þaulreyndur markvörður Vals, staðfesti á Facebook-síðu sinni seint í gærkvöldi að forráðamenn Vals væru hættir við. Það myndi ekkert hafa upp á sig, eins og Óskar Bjarni Óskarsson, þjálfari, ræddi um í viðtali við Vísi í gær.

Sjá einnig: Helsárir Valsmenn vilja kæra úrslitin í Rúmeníu

„IHF mun ýta þessu af borðinu, eins og öllum öðrum kærum. Íþróttin sem ég elska svo mikið varð allt í einu svo ógeðsleg, mér varð óglatt eftir leik. Úrslitunum verður ekki breytt, það er ljóst. Handboltahreyfingin er aumasta batterý sem til er,“ skrifaði Hlynur í pistli sínum.

Enn fremur sagði Hlynur að þjálfari rúmenska liðsins hafði viðurkennt eftir leik að hafa mútað dómurum leiksins. „Þjálfarinn hjá Rúmenunum viðurkenndi 20 þúsund evrur eftir leik á dómarana við einn okkar og hló. Langar mig að spila áfram handbolta?“

Pistil Hlyns má lesa hér fyrir neðan en þar segir hann að allir sem hafa séð klippurnar úr leiknum vita að þær dæma sig sjálfar.