Justin Timberlake og Jessica Biel snæddu í Bakarameistaranum

Stjörnuparið Justin Timberlake og Jessica Biel er statt á Íslandi um þessar mundir en í gær komu þau við í Bakarameistaranum í Suðurveri og fengu sér að borða. Nútíminn greindi fyrst frá.

Að sögn Magnúsar Inga Kjartanssonar sem afgreiddi parið voru þau afskaplega ánægð með matinn og þökkuðu vel og mikið fyrir sig.  

Magnús segir að honum hafi verið gert viðvart um komu stjörnuparsins um þrem mínútum áður en þau mættu. Þau hafi síðan komið inn ásamt fylgdarliði sínu.

„Þau komu þarna snemma morguns þegar eiginlega enginn var á staðnum. Þau fengu sér beikonbræðing og aspasstykki og drukku kaffi og Trópí með.“ 

Hann segir þau hafa setið ásamt fylgdarliði sínu um stund og sötrað kaffi og þar sem það hafi verið rólegt að gera og lítið af fólki hafi þau fengið að vera alveg í friði.

Aðspurður segist Magnús ekki hafa afgreitt heimsfrægt fólk áður en það hafi þó ekki verið neitt mál.

„Það var ekkert til að stressa sig yfir. Þetta er bara afskaplega kurteist fólk og mjög næs að afgreiða þau.“

Greint var frá því á Vísi í gær að stjörnuparið hafi komið hingað til lands á föstudag og muni dvelja hér í sex daga. Samkvæmt heimildum fréttastofu eru þau hér í fríi og ætla að nýta tímann í að skoða landið