Hlustaðu á nýju plötuna hans Ásgeirs Trausta

Önnur sólóplata tónlistarmannsins Ásgeirs Trausta Einarssonar, sem kallar sig Ásgeir, kom út í dag á heimsvísu en platan heitir Afterglow. Platan stökk beint í fyrsta sæti á iTunes Alternative listanum í Ástralíu og vermir þriðja sætið á iTunes Main. Þá situr hún á topp 10 listanum á iTunes Alternative í 18 löndum.

Tónleikaferð Ásgeirs hefst um helgina í Árósum og Kaupmannahöfn og þá mun hann jafnframt spila í Bataclan í París síðar á árinu.

Fyrsta plata Ásgeirs, Dýrð í dauðaþögn, kom út árið 2012 og sló rækilega í gegn. Ári síðar kom hún út á ensku og hét þá In the Silence en í kjölfarið fór Ásgeir á tónleikaferð um allan heim.

Líkt og á fyrstu plötu sinni vinnur Ásgeir með föður sínum Einari Georgi Einarssyni sem á heiðurinn að nokkrum textum á plötunni en að auki komu þeir Þorsteinn Einarsson og Júlíus Aðalsteinn Róbertsson að textagerðinni. Þá vann upptökustjórinn Guðmundur Kristinn Jónsson náið með Ásgeiri að gerð plötunnar.

Hlusta má á nýju plötuna á Spotify og þá má hlusta á titillag plötunnar í spilaranum hér fyrir neðan.