Will Ferrell sneri aftur sem George W. Bush og gerði óspart grín að Trump

Háðfuglinn Will Ferrell brá sér aftur í líki George W. Bush, fyrrverandi forseta Bandaríkjanna í sérstökum þætti af Full Frontal með Samantha Bee sem sjónvarpað var í gær.

Þátturinn gerði grín að árlegum kvöldverði blaða- og fjölmiðlamanna í Washington sem haldinn var í gær. Venjulega er mikið um dýrðir og mæta sitjandi forsetar iðulega til þess að grínast og láta gera grín að sjálfum sér. Donald Trump mætti þó ekki í þetta sinn.

Þegar Bush var forseti sá Will Ferrell um að herma eftir honum í Saturday Night Live þáttunum, líkt og Alec Baldwin gerir nú með sitjandi forseta. Það er þó langt síðan Ferrell hefur farið í gervi Bush.

Ferrell var á sviði í fimm mínútur og var Trump aðalefni atriðisins en það fyrsta sem Ferrell sagði á sviðinu var: „Hvernig líkar ykkur við mig núna,“ en þrátt fyrir miklar vinsældir í fyrstu varð Bush afar óvinsæll sem forseti undir lokin.

SJá má atriðið í heild sinni hér að neðan.