Valskonur fá 22 ára gamlan þjálfara úr vesturbænum

Valur er búinn að ganga frá ráðningu Darra Freys Atlasonar sem næsta þjálfara kvennaliðs félagsins í körfubolta en hann stýrir Valskonum í Domino´s-deildinni á næstu leiktíð.

Hann tekur við starfinu af Ara Gunnarssyni sem kom Val ekki í úrslitakeppnina á yfirstandandi leiktíð en Valur fór í snemmbúið sumarfrí eftir að lenda í fimmta sæti með 24 stig og vera fjórum stigum og einu sæti frá úrslitakeppninni.

Darri Freyr er ekki nema 22 ára gamall en hann er fæddur árið 1994. Hann er KR-ingur sem hefur komið að yngri flokka þjálfun vesturbæjariðsins í áratug, að því fram kemur í fréttatilkynningu frá Val.

Darri stýrði meistaraflokki kvenna hjá KR í 1. deildinni leiktíðina 2015/2016 og var þá valinn besti þjálfari deildarinnar. Hann hafnaði í öðru sæti í deildinni á eftir Skallagrími og tapaði svo í úrslitaeinvíginu um sæti í Domino´s-deildinni á móti sama liði.

„Körfuknattleiksdeild Vals setur markið hátt og er undirbúningur þegar hafinn að koma liðinu aftur í úrslitakeppnina þar sem liðið á heima. Flestir leikmenn liðisns eiga eitt ár eftir af sínum samningi við félagið en stefnan er að styrkja hópinn enn frekar fyrir komandi átök,“ segir í fréttatilkynningu Valsmanna.

Sjálfur kveðst Darri Freyr spenntur fyrir verkefninu. Hann segir Val vera stórt félag með langa sögu sem sýnir metnað í kvennakörfuboltanum.

„Aðstaðan á Hlíðarenda er frábær og leikmannhópurinn er sterkur - stelpur með umtalsverða reynslu, þrátt fyrir ungan aldur, m.a. með yngri landsliðum og A-landsliðinu. Ég mun fara yfir það á næstu vikum hverjir styrkleikar og veikleikar okkar eru og gera ráðstafanir í kjölfarið,“ segir Darri Freyr Atlason.