Vilja gera frið að vörumerki Norðurlanda

Forsætisnefnd Norðurlandaráðs hefur lagt til að friðarviðræður verði gerðar að opinberu vörumerki Norðurlanda. Tillögunni er beint til norrænu ríkisstjórnanna.

Í tilögunni er lagt til að friðarviðræður verði liður í sameiginlegu átaki forsætisráðherranna til að vekja athygli á norrænum lausnum við hnattrænum áskorunum og að þeim verði tryggður mikilvægur sess í opinberu norrænu samstarfi.

Þetta gæti meðal annars orðið að veruleika ef löndin kæmu á fót sameiginlegu háskólanámi á framhaldsstigi á sviði friðarviðræðna, t.d. innan ramma Norrænu meistaranámsáætlunarinnar.

„Norræna ráðherranefndin hefur látið vinna greinargóðar úttektir á mörgum mikilvægum sviðum, svo sem sviðum öryggis-, heilbrigðis- og orkumála. Við teljum að vinna ætti samsvarandi úttekt á sviði friðarmála,“ segir forseti Norðurlandaráðs, Britt Lundberg.

Tillagan inniheldur ennfremur greinargerð um möguleikana á því að koma á fót skjalasafni um sáttamiðlun í einu Norðurlandanna. Þá er einnig bent á jákvæða reynslu af stöðu sjálfstjórnarsvæðanna á Norðurlöndum, Færeyja, Álandseyja og Grænlands.

Segir í tillögunni að sama líkan mætti nýta annars staðar í heiminum þar sem leysa þarf snúin ágreiningsefni.

Hugmyndin að því að vekja athygli á friðarviðræðum kom upphaflega frá flokkahópi miðjumanna í Norðurlandaráði, og hefur tillagan hlotið stuðning flokkahóps vinstri sósíalista og grænna og flokkahóps hægrimanna.