Páll Magnússon: Stjórnendur HB Granda hafa ekki gert alveg hreint fyrir sínum dyrum

Páll Magnússon, þingmaður Sjálfstæðisflokksins og formaður atvinnuveganefndar, segir að skýringar stjórnenda útgerðarfyrirtækisns HB Granda á því hvers vegna fyrirtækið telur þörf á að flytja landvinnslu á botnfiski frá Akranesi til Reykjavíkur séu ófullnægjandi.

Hann segir aðgerðir fyrirtækisins gríðarlegt áfall og þyngra en tárum taki fyrir fólkið sem hugsanlega missi vinnuna vegna þessa en flutningnum hefur nú verið frestað. Forstjóri HB Granda, Vilhjálmur Vilhjálmsson, varar þó við bjartsýni í Fréttablaðinu í dag.

Páll ræddi þessi mál ásamt Lilju Rafneyju Magnúsdóttur, þingmanni Vinstri grænna og nefndarmanni í atvinnuveganefnd í Bítinu á Bylgjunni í morgun.

„Við erðum bara að sjá hvað kemur út úr þessu en aðalmálið í þessu finnst mér að það sem snýr að Granda þá finnst mér skýringar fyrirtækisins algjörlega ófullnægjandi á þessari aðgerð og mér finnst þeir ekki hafa gert alveg hreint fyrir sínum dyrum,“ sagði Páll í Bítinu í morgun.

Þá sagði hann jafnframt að það væri ekki þannig að fyrirtæki á stærð við HB Granda tæki svona afdrifaríkar ákvarðanir eins og að leggja niður fiskvinnslu „bara út af því að gengi íslensku krónunnar sem er nú alltaf flöktandi sé með einhverjum tilteknum hætti á tiltekinni tímasetningu.“

„Gengið hækkar og lækkar og menn taka ekki svona afdrifaríkar ákvarðanir út af því. Ef þetta er þannig að þeir vilja af hagkvæmnisástæðum flytja þessa botnfiskvinnslu eitthvað annað þá eiga þeir bara að segja það en ekki að vera að gefa til kynna að ástæðurnar séu einhverjar aðrar en þær eru í raun og veru. Þannig að fyrirtæki af þessu tagi [...] því fylgir ákveðin ábyrgð af hálfu þeirra sem  hafa fengið þessi afnot af auðlindinni og þeir verða að rísa undir þeirri ábyrgð. Með hvaða hætti staðið er að þessu uppi á Skaga af hálfu Granda þá hafa þeir ekki gert það,“ sagði Páll.

Lilja Rafney sagði að uppákoman á Akranesi væri stóralvarleg en þetta væri þó ekki í fyrsta skipti sem svona væri að gerast.

„Þetta er auðvitað bara það sem er búið að gerast á einhverju árabili vítt  og breitt um landið [...] En það er aldrei gert neitt til að hamla svona [...] það er að þeir sem hafi nýtingarrétt af auðlindinni hverju sinni geti bara hagað sér nákvæmlega eins og þeim dettur í hug með pjúra gróðasjónarmið í huga,“ sagði Lilja Rafney en hlusta má á viðtalið við þau Pál í spilaranum hér að ofan.