Bretar banna einnig stærri raftæki á ákveðnum flugleiðum

Bresk yfirvöld hyggjast feta í fótspor bandarískra yfirvalda og leggja bann við að flugfarþegar taki stærri raftæki á borð við fartölvur og spjaldtölvur um borð í flugvélar sem ferðast frá ákveðnum ríkjum. BBC greinir frá.

Mun breska bannið gilda um fjórtán flugfélög sem flúga frá Tyrklandi, Líbanon, Jórdaníu, Egyptalandi, Túnis og Sádí-Arabíu til Bretlands. Bannið gildir einungis um handfarangur en enn má ferðast með tækin séu þau í innrituðum farangri

Yfirvöld í Kanada hafa það einnig til skoðunar að setja á keimlíkt bann sem sett er í kjölfar upplýsinga sem njósnarar á vegum bandarískra yfirvalda komust yfir erlendis.

Bandarísk yfirvöld riðu á vaðið í dag og hyggjast þau banna flugfarþegum sem ferðast frá átta löndum þar sem múslimar eru meirihluti íbúa að taka með sér stærri raftæki um borð í vélarnar.

Bannið hefur áhrif á níu mismunandi flugfélög sem fljúga frá tíu flugvöllum í löndum Jórdaníu, Egyptalandi, Marokkó, Tyrklandi, Sádi Arabíu, Quatar, Sameinuðu arabísku furstadæmunu og Kúveit.