Lögreglan enn ekki náð á manninn sem grunaður er um árás í bíósal

Lögreglan hefur ekki enn náð á manninn sem grunaður er um líkamsárás í Sambíóunum í Egilshöll fimmtudaginn 2. mars síðastliðinn.

Árásin átti sér stað í sal 3 á sýningu á myndinni xXx: Return of Xander Cage. Sá sem kærði árásina er piltur um tvítugt en sá sem er grunaður um hana er sagður litlu eldri en sá sem kærði árásina.

Lögreglan telur sig vita hver maðurinn er sem grunaður er um árásina en enn á eftir að hafa upp á honum.

Vísir greindi frá málinu í síðustu viku en þá var sagt frá því að árásin hefði átt sér stað fyrir utan kvikmyndasal í Sambíóunum í Egilshöll en hið rétt er að hún átti sér stað í sal 3.

Í kærunni til lögreglunnar var talað um að gerandinn hefði rifið upp áhald undir lok árásarinnar sem líktist hnúajárni en Ásgeir Pétur Guðmundsson, sem fer með rannsóknar málsins, segir enga staðfestingu hafa fengist á því.