Milljarður tíma á YouTube

Mannkyn horfir nú á myndbönd á myndbandaveitunni YouTube í samtals einn milljarð klukkustunda dag hvern. Jafngildir það nærri átta og hálfri mínútu á mann. Þetta kemur fram í bloggfærslu YouTube sem birtist í gær.

„Leyfið okkur að setja þetta í samhengi. Ef þú myndir setjast niður og horfa á YouTube í milljarð klukkustunda myndi það taka þig meira en hundrað þúsund ár. Fyrir hundrað þúsund árum bjuggu forfeður okkar til verkfæri úr steinum og fluttust frá Afríku á meðan loðfílar ráfuðu um jörðina,“ segir í bloggfærslunni.

Þá segir að vöxt í áhorfi megi rekja til gervigreindar sem stingi upp á því hvaða myndband notendur ættu að horfa á næst. Sú tækni var kynnt til sögunnar árið 2012. Síðan þá hefur daglegt áhorf tífaldast. 

Fréttin birtist fyrst í Fréttablaðinu.