„Við teljum okkur vera búin að yfirheyra hann nokkuð stíft“

„Við teljum okkur vera búin að yfirheyra hann nokkuð stíft, jafnvel þó það hafi ekki verið gert síðustu daga,“ segir Grímur Grímsson yfirlögregluþjónn um manninn sem er í gæsluvarðhaldi grunaður um aðild að dauða Birnu Brjánsdóttur.

Maðurinn var síðast yfirheyrður á fimmtudag en sama dag var hann úrskurðaður í áframhaldandi tveggja vikna gæsluvarðhald og einangrun.

Grímur segir að sá tími mun koma þegar maðurinn verður yfirheyrður á ný en engin ákvörðun verið tekin hvenær það verður.

Leitað var að munum Birnu Brjánsdóttur í Selvogi á sunnudag vegna ábendingar sem barst frá borgara um helgina. Grímur segir enga frekari leit fyrirhugaða á svæðinu því lögreglan telur sig vera búna að fara í gegnum það sem átti að fara í gegnum.

Hann segir endanlega krufningsskýrslu ekki liggja fyrir en að lögreglan telji það liggja fyrir hver hún var.

Fréttastofa Ríkisútvarpsins greindi frá því í gær að dánarorsök Birnu hefði verið drukknun og að einnig hefðu verið áverkar sem benda til þess að þrengt hafi verið að hálsi hennar.

Grímur vildi ekkert tjá sig um þetta í samtali við Vísi.