Gefur verðlaunin til baka

Ég er mjög upp með mér yfir þessari fallegu nafnbót,“ segir nýútnefndur bæjarlistamaður Seltjarnarness árið 2017, Nína Dögg Filippusdóttir leikkona. 

Upphefðinni fylgir verðlaunafé, ein milljón króna, en hún kveðst ætla að láta það fé renna til leiklistar í bæjarfélaginu og hefur ákveðið að ánafna það ungu fólki.

„Ég ætla að bjóða upp á námskeið fyrir unglinga, þeim að kostnaðarlausu, sem Improv Island sér um og svo munu þeir halda smá sýningu á menningarhátíð bæjarins í október. Svona námskeið auka á sjálfsöryggi og það er gott fyrir unglingana,“ segir hún og bætir við að bærinn ætli að lána félagsheimilið undir þetta starf.

Nína Dögg segir margt gott hafa hent hana í lífinu, eitt af því sé að flytja á Nesið. „Okkur hjónum var sérlega vel tekið hér,“ segir hún.

 „Þetta er dásamlegur staður að búa á og maður hefur á tilfinningunni að maður tilheyri litlu, sætu samfélagi.“

 

Greinin birtist fyrst í Fréttablaðinu 21. janúar 2017