Mayweather segist eiga von á því að berjast við Conor

Hnefaleikakappinn Floyd Mayweather segist eiga von á því að hann muni berjast við írska vélbyssukjaftinn Conor McGregor en báðir voru þeir spurðir út í möguleikann á þessum ótrúlega bardaga um helgina.

„Ég á von á því að við munum berjast, hann er ótrúlegur keppnismaður og hefur sýnt það í UFC að hann getur vel barist standandi. Við þurfum að sjá hvað gerist en vonandi getum við náð saman. Aðdáendurnir hafa kallað eftir þessum bardaga og vonandi getum við svarað kallinu.“

Conor svaraði fyrirspurnum aðdáenda í beinni útsendingu þar sem hann staðfesti að báðir aðilar hefðu áhuga á að bardaginn færi fram fyrir árslok 2018.

„Það er meira í gangi heldur en að við séum aðeins að skoða möguleikann á þessu, þetta hefur verið á áætlun í lengri tíma en það. Þetta er bardagi sem áhorfendur vilja sjá og ég vill taka þátt í,“ sagði Conor sem var spurður út í næstu skref í UFC.

„Næsti bardagi minn verður með boxhönskum á, ég er með augastað á einum manni og það er Floyd,“ sagði Conor.