Tesla hefur fjöldaframleiðslu rafhlaðna

Risavaxin verksmiðja rafbílaframleiðandans Tesla hóf í gær fjöldaframleiðslu lithium-ion rafhlaðna. Er verksmiðjunni ætlað að útvega öllum bílum hinnar nýju tegundar, Model 3, rafhlöður. Einnig mun verksmiðjan framleiða rafhlöður fyrir Powerwall 2, heimilisrafhlöðu Tesla.

Fram til þessa hefur Panasonic framleitt rafhlöður fyrir Tesla. Hins vegar er búist við því að hin nýja verksmiðja tryggi að eftirspurn verði annað og að kaupendur Model 3 bíla fái bíla sína í hendurnar á skikkanlegum tíma. Frá þessu greinir Tech­Crunch.

Verksmiðjan, sem kölluð er Gigafactory, var opnuð í fyrra og hefur fram til þessa sett saman vörur á borð við Powerwall auk þess að vinna að undirbúningi fyrir komandi vörur Tesla.

Enn sem komið er framleiðir verksmiðjan eingöngu rafhlöður fyrir Powerwall en framleiðsla rafhlaðna í Model 3 hefst á öðrum fjórðungi þessa árs.

Það að anna eftirspurn er ekki eina markmið rafbílarisans með þessari breytingu. Fjöldaframleiðsla rafhlaðna á einnig að lækka verð á vörum frá Tesla þar sem hagkvæmara er að framleiða rafhlöðurnar í miklu magni. Þá verði færri mistök við framleiðslu rafhlaðnanna þar sem verksmiðjan er að miklu leyti sjálfvirk.

Þrátt fyrir háþróuð framleiðslutæki munu um 6.500 manns starfa við verksmiðjuna þegar hún er fullkláruð og komin á fulla ferð.

Tesla tilkynnti á þriðjudag að fyrirtækið hefði framleitt 83.922 bíla á síðasta ári og skilað 76.230 í hendur kaupenda. Áætlað var að skila 80.000 bílum. Ástæðan þess að það tókst ekki var sögð vera vandamál við flutninga og framleiðslu.

Fréttin birtist fyrst í Fréttablaðinu.