Túnisinn hafði átt í samskiptum við predikarann Abu Walaa

Umfangsmikil leit stendur nú yfir í Evrópu allri að túnískum manni sem grunaður er um að hafa átt aðild að árásinni á jólamarkaðnum í Berlín á mánudagskvöld.

Þýskir fjölmiðlar kalla manninn Anis A og segja hann fæddan 1992. Skjöl um landvistarleyfi mannsins fundust um borð í vörubílnum.

Talið er að hann hafi særst í átökum við pólskan vörubílstjóra sem hann rændi bílnum af og skaut síðar til bana.

Tólf manns féllu í árásinni og tugir særðust. Enn er verið að hlúa að 24 á sjúkrahúsum í Berlín.

BBC segir frá því að um 150 lögreglumenn hafi í dag tekið þátt í húsleit á stöðum í Emmerich í norðvesturhluta Þýskalands, þar sem landvistarleyfi mannsins var gefið út.

Angela Merkel Þýskalandskanslari hefur fundað með öryggisráði landsins í dag vegna árásarinnar.

Vitað er að Túnisinn hefur notast við fjölda dulnefna. Hann á að hafa ferðast til Ítalíu árið 2012 og síðar til Þýskalands árið 2015 þar sem hann sótti um hæli og var veitt landvistarleyfi í apríl á þessu ári.

Hann hafði áður komið við sögu lögreglu, en hann var handtekinn í ágúst með fölsuð ítölsk skilríki og síðar sleppt.

Süddeutsche Zeitung greinir frá því að Túnisinn hafi átt í tengslum við íslamska predikarann Ahmad Abdelazziz A, betur þekktur sem Abu Walaa, sem handtekinn var í síðasta mánuði.