Mynd af Schumacher á sjúkrabeðinu boðin til sölu

Ljósmynd af ökuþórnum Michael Schumacher er nú til sölu fyrir eina milljón evra samkvæmt enskum og þýskum fjölmiðlum.

Engar myndir hafa birst af Schumacher síðan hann hlaut heilaskaða í alvarlegu skíðaslysi fyrir tæpum þremur árum síðan.

Fjölskylda og aðrir aðstandendur hafa lagt ofuráherslu á að verja einkalíf Schumacher eftir slysið og upplýsingagjöf um líðan hans og heilsu hefur verið lítil.

Umrædd mynd mun sýna Schumacher liggjandi í rúmi sínu eftir slysið en hann hefur eftir sjúkrahúsdvöl sína fengið umönnun á heimili sínu í Genf í Sviss.

Ekki er vitað hver hefur boðið myndina til sölu en yfirvöld í Offenburg í Þýskalandi hafa staðfest að málið hafi verið tekið til rannsóknar.

Skömmu eftir að Schumacher var lagður inn á sjúkrahús í desember 2013 reyndist blaðamaður, vopnaður myndavél, að smygla sér inn á herbergi hans með því að klæða sig upp sem prestur.