Skyldaðir til að bera vitni

Hæstiréttur í Danmörku hefur úrskurðað að þrír starfsmenn danska fjármálaeftirlitsins geti ekki falið sig á bak við þagnarskyldu. Þeir verði að bera vitni í málinu gegn Roskilde Bank sem varð gjaldþrota 2008.

Ríkisfyrirtækið Finansiel Stabilitet, sem tók yfir fjölda banka í hruninu, hefur krafist eins milljarðs danskra króna af átta háttsettum starfsmönnum bankans, endurskoðunarfyrirtæki hans og tveimur endurskoðendum.

Roskilde Bank var gagnrýndur í þremur skýrslum danska fjármálaeftirlitsins á árunum 2005 til 2008. Það er mat ríkisfyrirtækisins Fin­ansiel Stabilitet að mikilvægt sé að starfsmennirnir þrír beri vitni þar sem þeir hafi setið marga fundi í bankanum áður en hann varð gjaldþrota. Þeir hafi þess vegna vitað hvað var að gerast. 

Fréttin birtist fyrst í Fréttablaðinu