19 ára tekinn á 335 km hraða

Þeim brá aðeins í brún lögreglunni í Oklahoma þegar talan 335 km/klst stóð á hraðamælingartæki þeirra um daginn, en þá veittu þeir 19 ára manni eftirför á Ford Mustang bíl. Þegar lögreglan tók fyrst eftir hraðakstri unga mannsins mældist hann “aðeins” á 135 km hraða og hófst þá eltingaleikur lögreglunnar við Mustang bílinn. Hann jók sífellt hraðan og mældist á endanum á 335 km hraða, sem er hreint með ólíkindum.

Í fyrsta lagi á venjulegur Ford Mustang ekki að ná nálægt því þessum hraða, Mustang GT er takmarkaður við 250 km hraða og Mustang Shelby GT500 nær 304 km hraða. Ungi maðurinn mældist hinsvegar á 335 km/klst. Það er þó ástæða fyrir þessum hraða unga mannsins. Hann hefur tjúnað og breytt bíl sínum svo mikið að hann skilar 1.200 hestöflum.

Það er þó ekki víst að þessi ungi maður að nafni Hector Fraire fái að njóta mikið hins öfluga bíls síns á næstunni því á endanum náði lögreglan að stöðva förina er hann lenti á rauðu ljósi og hlýddi þá loks lögunum. Hann má eiga von á vænni sekt og ökuleyfissviptingu, en ekki er ljóst hvort hann hafi þurft að dvelja lengi í fangelsi fyrir glæfraför sína.