Nýi Toyota C-HR hýfður upp á Petersen svítuna

Fólk hélt niðrí sér andanum þegar nýr C-HR frá Toyota var hífður upp á þaksvalir Petersen svítunnar í gærkveldi. Bíllinn mun þó ekki stoppa lengi við á þakinu en hann verður heiðursgestur á sérstakri forsýningu sem verður haldin annað kvöld á bílnum fyrir boðsgesti Toyota. Það var stór kranabíll sem notaður var til verksins og sjá má hvernig þetta var gert í meðfylgjandi myndskeiði.

Heimsbyggðin hefur aldrei verið ginkeyptari fyrir smáum jepplingum og nú og þeir bílaframleiðendur sem ekki nú þegar bjóða slíka bílgerð munu flestir gera það bráðlega. Söluaukning í þessum flokki er gríðarleg á milli ára og vestanhafs nemur hún 90%. Í þennan flokk bíla fellur einmitt nýjasta afurð Toyota, C-HR og sýndi Toyota bílinn í endanlegu útliti sínu á bílasýningunni í Genf í mars síðastliðnum, en nú er hann kominn til Íslands.

Jepplingurinn er svo til óbreyttur frá tilraunaútgáfunni, C-HR Concept. Toyota C-HR verður í boði sem tvinnbíll, auk hefðbundinnar brunahreyfilsútgáfu. Bíllinn er byggður á sama undirvagni og Toyota Prius. Þessi nýi bíll Toyota er á stærð við Nissan Juke, Honda HR-V og Mazda CX-3 og er einmitt ætlað að keppa um hylli kaupenda við þá bíla.