Celta með óvæntan sigur á Barcelona

Celta hafði betur á heimavelli gegn stórliði Barcelona í sjö marka spennutrylli sem lauk með 4-3 sigri Celta.

Celta komst 3-0 yfir snemma leiks og náði að standa af sér áhlaup Börsunga undir lok leiksins.

Gerard Pique minnkaði muninn á 58. mínútu og fimm mínútum síðar bætti Neymar við marki af vítapunktinum og skyndilega var munurinn aðeins eitt mark.

Pablo Hernandez bætti við marki fyrir Celta á 77. mínútu eftir hroðaleg mistök Marc ter Stegen í marki Barcelona og var munurinn skyndilega kominn aftur í tvö mörk.

Pique náði að minnka muninn á ný með öðru marki sínu og þriðja marki Barcelona á 87. mínútu en lengra komust Katalóníumenn ekki.

Mistókst Börsungum því að nýta gullið tækifæri til þess að ná toppsæti spænsku deildarinnar fyrir landsleikjahlé en Atletico situr í efsta sæti að sjö umferðum loknum.