Ísland kemur til greina sem félagi Finnlands á EM og spilar þá í Helsinki

Ísland er eitt af þeim löndum sem kemur til greina sem félagi Finnlands á Evrópumótinu í körfubolta á næsta ári en þjóðirnar fjórar sem hýsa riðlakeppnina; Finnland, Tyrkland, Ísrael og Rúmenía, mega velja sér eina þjóð með sér í riðil sem verður einnig samstarfsaðili heimaþjóðarinnar og tekur þátt í skipulagningunni.

Af augljósum ástæðum eins og fjarlægð frá Íslandi er Finnland betri kostur en Tyrkland (Istanbúl) og Ísrael (Tel Aviv). Rúmenía kemur að öllum líkindum ekki til greina þar sem miklar líkur eru á að Rúmenar verði í styrkleikaflokki með Íslandi

Áfram @kkikarfa Welcome to your 2nd-straight FIBA EuroBasket! #EuroBasket2017pic.twitter.com/nyK2t7yDkO

— FIBA (@FIBA) September 20, 2016

Gulrótin í þessu öllu saman fyrir bæði Íslendinga og Finna er, að 2. september, þremum dögum eftir að Evrópumótið hefst, mætir íslenska karlalandsliðið í fótbolta Finnum í Helsinki í undankeppni HM 2018. Fótboltalandsliðið er gríðarlega vinsælt um þessar mundir og væri heldur betur vænlegt fyrir Íslendinga að sækja Finna heim og sjá bæði körfuboltalandsliðið á lokamóti og mikilvægan landsleik fótboltastrákanna.

„Við viljum fá körfubolta- og fótboltafólk saman til Helsinki í eitt gott partí á næsta ári. Við verðum að sameinast í þessu. Ég tel að það verði hægt, og það er okkar markmið, að fá 2.500-3.000 Íslendinga til Helsinki. Þannig seljum við þetta. Við verðum að geta lofað þessum fjölda,“ segir Hannes S. Jónsson, formaður KKÍ, í samtali við Vísi.

Finnar með fleiri möguleika

Hannes og starfsfólk KKÍ ferðast til Helsinki á mánudaginn og funda með Finnunum sem telja Ísland spennandi kost. Vísir hafði samband við Ara Tammivaara hjá finnska körfuknattleikssambandinu og truflaði hann er hann sat fund með yfirmönnum FIBA Europe þar sem var verið að ræða EM.

„Ég verð bara að óska ykkur til hamingju með þennan frábæra árangur. Það hefur verið alveg magnað að fylgjast með árangri íslenska landsliðsins undanfarin misseri. Við fögnum því gríðarlega að fá aðra svona minni þjóð inn á EM og sérstaklega vini okkar á Norðurlöndunum,“ sagði Ari ákafur áður en blaðamaður gat borið upp erindið.

Aðspurður um hvort Ísland væri ekki fýsilegur kostur fyrir Finnana út af nálægðinni og sérstaklega þessum landsleik játti Ari því, en hann er einn af þeim sem tekur ákvörðunina fyrir finnska sambandið.

„Við áttum okkur klárlega á því að Ísland er spennandi kostur. Ég verð samt að vera heiðarlegur með það, að það eru fleiri sem hafa áhuga á samstarfi við okkur. Við þurfum að taka ákvörðun fyrir lok október þannig nú tekur við 5-6 vikna vinna áður en við ákveðum okkur,“ segir Ari, en að hverju eru Finnarnir að leita?

„Númer eitt, tvö og þrjú viljum við búa til frábæran viðburð. Frakkarnir völdu okkur sem félaga sinn á síðasta Evrópumóti og við mættum með 5.000 Finna til Lille. Höllin var full á öllum leikjum því okkar fólk var svo duglegt að mæta. Úr varð frábær viðburður og okkur langar að endurgera þetta hjá okkur,“ segir Ari Tammivara.

Allt gert til að ná samkomulagi

Vissulega er möguleiki á að Ísland endi í riðli með Finnum og spili í Helsinki þegar dregið verður til riðlakeppninnar í lok nóvember. En það er ekki bara að spila svona nálægt Íslandi sem heillar KKÍ heldur getur sambandið haft áhrif á eigin örlög fái það að stýra riðlinum ásamt Finnunum.

„Þegar við hittumst í næstu viku munum við leggja mikla áherslu á að ná samkomulagi við Finnana. Þetta snýst ekki bara um að spila í Helsinki heldur getum við sem félagar þeirra haft áhrif á alla skipulagningu og riðilinn,“ segir Hannes sem var ekki alveg nógu ánægður með allt í kringum EM í Berlín fyrir ári síðan.

„Það sem okkur fannst vanta í Berlín var til dæmis svona alvöru „Fan Zone“ fyrir utan höllina þar sem fólk getur hist og myndað stemningu. Ef við verðum félagar Finnanna og fáum einhverju ráðið getum við gert kröfur um slíkt. Við vonumst svo sannarlega eftir að ná samkomulagi við þá og það sem fyrst þannig fólk geti bara farið að gera ráð fyrir því að fara til Helsinki á körfuboltamót og fótboltaleik næsta haust,“ segir Hannes S. Jónsson.