Ford F-150 með Land Rover dísilvél

Ford er nú að undirbúa andlitslyftingu fyrir 2018 árgerðina af söluhæsta bíl sínum, pallbílnum Ford F-150. Meðal nýjunga sem í boði verða frá og með þessari árgerð verður dísilvél og það ekki úr smiðju Ford heldur Jaguar Land Rover.

Þessi vél er 3,0 lítra V6 og skilar 254 hestöflum og 595 Nm togi. Það er nokkru meira en er í samkeppnisbílnum Ram EcoDiesel, en sá bíll er með 240 hestafla dísilvél með 570 Nm togi, en auk þess er sá bíll miklu þyngri. Ástæða þess er að hann er smíðaður úr stáli, en Ford F-150 úr áli að mestu leiti.

Í þessum nýja Ford F-150 með dísilvél á að vera start-stop tækni til að stuðla að enn minni eyðslu bílsins og hann verður búinn 10 gíra sjálfskiptingunni sem Ford þróaði með General Motors. Nú þegar Ford F-150 er framleiddur úr áli og kominn með sparneytna dísilvél og 10 gíra sjálfskiptingu er líklega kominn eyðslugrennsti stóri pallbíll heims.