Hamilton: Ég er ennþá inn í baráttunni um heimsmeistaratitilinn

Nico Rosberg vann sína þriðju keppni í röð í dag. Hann er sá eini sem unnið hefur keppni eftir sumarfrí. Rosberg tók forystuna í stigakeppni ökumanna. Hver sagði hvað eftir keppnina?

„Ég náði góðri ræsingu og bílinn gekk vel. Daniel [Ricciardo] reyndi að koma mér á óvart með því að taka þjónustuhlé. Ég gat svarað því með því að vera úti. Bremsurnar eru alltaf tæpar hér í Singapúr,“ sagði Rosberg á verðlaunapallinum.

„Ég er ekki vonsvikinn með þetta. Við reyndum smá taktík undir lokin og vorum innan við hálfri sekúndu frá fyrsta sætinu. Þetta var erfið keppni,“ sagði Daniel Ricciardo á verðlaunapallinum.

„Ég vil byrja á að óska Nico til hamingju. Hann hefur ekið vel alla helgina. Bremsurnar voru að ofhitna, ég þurfti að hægja á mér vegna þess. Það gerði mér erfitt fyrir. Á heildina litið er ég ennþá inn í baráttunni og mun gefa allt í baráttuna,“ sagði Lewis Hamilton á verðlaunapallinum. Hamilton tók lítinn sem engan þátt í fögnuðinum eftir verðlaunaafhendinguna.

„Það getur allt gerst hérna og þetta var afar gaman. Við komumst í takt við keppninna um miðbik hennar. Við vorum að vonast eftir öryggisbíl sem kom ekki. Við getum þó verið ánægðir með þessa niðurstöðu. Bíllinn virkaði vel á últra-mjúkum dekkjunum. Við erum fyrst og fremst að hugsa um okkur, Mercedes eru enn á undan við munum halda baráttunni áfram,“ sagði Sebastian Vettel sem varð fimmti á Ferrar bílnum. Vettel ræsti 22. af stað og fékk að hafa fyrir fimmta sætinu í dag.

„Þetta var afar tæpt undir lokin, við veðrum að taka að ofan fyrir Red Bull. Þeir voru með góða keppnisáætlun. Nico er búinn að vera mjög góður alla helgina. Lewis var búinn að vera í veseni alla helgina vegna þess að hann byrjaði æfingarnar með vandræðagangi,“ sagði Toto Wolff, liðsstjóri Mercedes.

„Keppnin var raunar búin fyrir mig á fyrsta hring. Ég snerti Valtter Bottas þegar ég var að forðast Nico Hulkenberg. Bremsurnar voru að ofhitna og jafvægið var ekki í lagi. Ég hlakka til að komast aftur í bílinn,“ sagði Jenson Button sem hætti keppni á McLaren bílnum í dag.

„Með tilliti til ræsingarinnar var keppnin mjög góð. Ég þurfti að passa dekkin alla keppnina. Ég hef ekki hugmynd hvernig ég slapp við Nico Hulkenberg. Ég bað ekki um að Daniil Kvyat yrði látinn víkja fyrir mér,“ sagði Max Verstappen sem varð sjötti á Red Bull bílnum.

„Við vorum ekki nógu grimmir með keppnisáætlunina. Við hefðum getað keppt við Fernando Alonso að mínu mati. Það er þó gott að sjá að við erum komin aftur í stigasæti. Það var gaman að keppa í dag og ég er orðinn eins og ég á að mér að vera,“ sagði Daniil Kvyat sem varð níundi á Toro Rosso bílnum. Hann er líklega að aka til að bjarga ferli sínum í Formúlu 1.