Haukar örugglega áfram í aðra umferð

Haukar eru komnir áfram í 2. umferð forkeppni EHF-bikarsins eftir öruggan sigur á gríska liðinu Diomidis Argous í dag, 28-20, en leikurinn var spilaður ytra.

Íslandsmeistararnir unnu fyrri leikinn í gær með sjö marka mun, 33-26, og einvígið samtals með fimmtán marka mun, 61-46.

Haukar mæta sænska liðinu Alingsås í næstu umferð. Leikirnir fara fram í byrjun október. Fyrri leikurinn verður spilaður 8. eða 9. október og sá síðasti 15. eða 16. október.

Haukar þurfa að vinna þrjú einvígi til að komast í riðlakeppni EHF-bikarsins og er næsta verkefni sem fyrr segir gegn sænska liðinu.

Markaskorarar Hauka verða uppfærðir hér um leið og upplýsingar um þá verða í boði.