Messi vill enda ferilinn þar sem hann byrjaði

Þó svo Lionel Messi sé aðeins 29 ára gamall er hann farinn að hugsa um hvernig hann vill enda sinn glæsilega feril.

Hann byrjaði sjö ára gamall í fótbolta með Newell's Old Boys í heimalandinu, Argentínu. Hann fór svo 14 ára gamall til Katalóníu og er þar enn.

„Það væri æðislegt að fara aftur til Newell's. Það er eitthvað sem mig hefur dreymt um síðan ég var barn,“ sagði Messi um mögulega endurkomu til síns fyrsta félags.

„Auðvitað breyttist líf mitt snemma og ég fór aðra leið sem ég sé svo sannarlega ekki eftir. Ég vil samt fá að spila í argentínska boltanum áður en ég hætti og það með Newell's.“

Messi er að hefja sitt þrettánda tímabil hjá Barcelona þar sem hann hefur spilað yfir 350 leiki og skorað 314 mörk.