Goodell er hræðilegur

Yfirmaður NFL-deildarinnar, Roger Goodell, er ekki í miklum metum hjá leikmönnum deildarinnar og sumir þora vel að segja það í fjölmiðlum.

Einn þeirra er Josh Norman, bakvörður Washington Redskins, en hann var í viðtali hjá tímariti ESPN.

„Hann er hræðilegur. Hreint og beint hræðilegur,“ sagði Norman þegar hann var spurður út í Goodell.

Norman var einn af lykilmönnum Carolina Panthers sem fór alla leið í Super Bowl á síðustu leiktíð. Hann er nú genginn í raðir Washington Redskins.

Það hefur verið mikil umræða síðasta árið um Redskins-nafnið sem mörgum finnst vera móðgandi og hefur verið lögð fram sú krafa að félagið breyti um nafn.

„Mér finnst Redskins alls ekki vera móðgandi. Sjálfur er ég indíáni að hluta og það er fyndið að bleiknefji skuli spila fyrir bleiknefjana,“ sagði Norman brattur að venju.