Jafntefli í hörkuleik hjá Túnis og Katar

Túnis og Katar mættust í hörkuleik á ÓL í Ríó í dag. Dramatískum leik lauk með jafntefli, 25-25.

Kamal Aldin Mallash jafnaði fyrir Katara er tólf sekúndur lifðu leiks. Túnisbúar fóru í lokasóknina en skot Wael Jallouz var varið af vörn Katara.

Oussama Boughanmi var markahæstur í liði Túnis með átta mörk. Rafael Capote fór á kostum í liði Katara og skoraði tólf mörk.

Þetta var fyrsta stig Túnisbúa á mótinu en Katar er komið með þrjú stig með einn sigur, eitt jafntefli og eitt tap.