Óæskilegir Pokémon-ar bannaðir víða um heim

Snjallsímaleikurinn Pokémon Go hefur verið gríðarlega vinsæll undanfarin misseri en ekki eru allir sáttir við að leikurinn sé spilaður á þeirra landareign. Kvartanir hafa borist frá Auschwitz, helfararminnisvarðanum í Berlín og minnisvarða í Japan um kjarnorkuárásina á Hiroshima undan því að fólk sé að spila leikinn í stað þess að velta fyrir sér þunga sögunnar.

Margir hafa gengið enn lengra og hafa yfirvöld í Íran og Sádí-Arabíu lagt blátt bann við leiknum.

Yfirvöld í Íran bönnuðu leikinn aðeins dögum eftir að hann kom út en þar voru uppi áhyggjur af því að leikurinn yrði notaður til njósna. Ungmenni í Íran hafa náð að komast hjá banninu með því að fela staðsetningu sína.

Í Sádi-Arabíu var endurútgefin fimmtán ára gömul bannfæring (e. fatwa) sem bannar Pokémon sem viðbragð við snjallsímaútgáfunni. Rök yfirvalda þar í landi eru að leikurinn líkist of mikið fjárhættuspili og að hann virðist byggja á þróunarkenningunni, en henni er hafnað í múslimatrú.

Í Bosníu hafa Pokémon þjálfarar verið varaðir við því að spila leikinn á hættusvæðum þar sem jarðsprengjur úr stríði tíunda áratugarins geta leynst. Þetta kemur fram í samantekt á vef Yahoo.

Erfitt að fjarlægja Pokémon-a algjörlega

Pokémonar birtast í kringum svokölluð pokéstop sem eru yfirleit þekkt kennileiti. Syttan af Jóni Sigurðssyni á Austurvelli er til dæmis gott dæmi um slíkt. Á Pokéstoppum geta pokémon-þjálfarar einnig safnað hinum ýmsu tólum sem hjálpa til við pokémon leit. Svokölluð Poké-gym birtast einnig við kennileiti, en þar geta pokémon þjálfarar keppst um yfirráð með því að láta Pokémona sína berjast.

Mögulegt er að biðja Niantic, framleiðanda leiksins, að fjarlægja staði af lista yfir Pokéstop eða Pokégym. Ekki er hægt að fjarlægja þau fyrirvaralaust en með hverri uppfærslu leiksins uppfærist listinn yfir slíka staði einnig. Í nýjustu uppfærslu leiksins er til að mynda búið að fjarlægja helfararminnisvarðann í Berlín og minnismerkið um Hiroshima sprenginguna í Japan. 

Ekki eru erlendir aðilar þeir einu sem hafa viljað losna við pokémonþjálfara en eigandi Fjörukrárinnar í Hafnarfirði hefur einnig biðlað til Niantic um að fjarlægja kennileiti í kringum krána af listanum.

Pokémonar geta hins vegar birst nánar hvar sem er og er gífurlega flókið að fjarlægja þá algerlega af stöðum þar sem nærveru þeirra er ekki óskað. Samkvæmt The Pokémon Company er nú unnið að því að bæta reiknilíkan leiksins svo að þeir birtist síður á óæskilegum slóðum.