Hamilton klessti á vegg | Mercedes-menn bestir á báðum æfingum

Lewis Hamilton á Mercedes var fljótastur á fyrri æfingunni fyrir ungverska kappaksturinn. Hann endaði seinni æfinguna á varnarvegg. Nico Rosberg varð annar á Mercedes á fyrri æfingunni en fljótastur á seinni.

Fyrri æfingin

Hamilton setti tíma sem var sjö tíundu hraðar en tíminn sem skilaði ráspól í fyrra. Rosberg sem er ný búinn að endurnýja samning sinn við Mercedes var tveimur tíundu á eftir Hamilton. Báðir ökumenn eru nú samningsbundnir Mercedes út næsta tímabil.

Ferrari liðið raðaði sér á eftir Mercedes og þar á eftir kom Red Bull.

Nýtt malbik á brautinni var hált og náði meira að segja að snúa kempum á borð við Fernando Alonso, Jenson Button og Sebastian Vettel.

Seinni æfingin

Daniel Ricciardo á Red Bull varð annar á seinni æfingunni á eftir Rosberg. Vettel varð aftur þriðji. Tími Rosberg var orðinn einni og hálfri sekúndu fljótari en ráspólstími síðasta árs.

Hamilton varð fimmti, hann missti stjórn á bílnum á æfingunni og skautaði á hlið á varnarvegg. Hamilton gat haldið áfram en var skipað að fara í læknisskoðun. Mælir í bíl hans nam yfir 10G og þá þurfa ökumenn að sæta læknisskoðun í öryggisskyni.

McLaren virðist ganga vel á brautinni en á báðum æfingum voru McLaren ökumennirnir í sjöunda og áttunda sæti. Af því má draga þá ályktun að bíllinn sé í grunninn góður en aflskortur sé þeirra helsta vandamál. Kannski best geymda leyndarmál Formúlu 1.

Bein útsending frá tíamtökunni hefst klukkan 11:50 á morgun á Stöð 2 Sport. Bein útsending frá keppninni hefst klukkan 11:30 á sunnudag einnig á Stöð 2 Sport.

Hér fyrir neðan má finna öll helstu úrslit helgarinnar.