Spá allt að 22 stiga hita fyrir austan

Veðurstofan spáir sól og sumri Suðaustur-og Austurlandi í dag þar sem hiti gæti mögulega farið yfir 20 stig. Í hugleiðingum veðurfræðings segir að á austurhelmingi landsins sé hægur vindur og að sólin skíni glatt. Hins vegar megi búast við svolítilli vætu á Vesturlandi og Vestfjörðum í dag en það lægi síðdegis.

Á morgun er síðan spáð hægri breytilegri átt eða hafgolu um land allt. Inn til landsins verður léttskýjað og hiti mun verða kringum 20 stig þegar best lætur.

„Sjór kringum landið er svalur svona snemsumars og í hlýju lofti eins og nú er yfir landinu myndast oft þoka úti fyrir ströndum sem líkur eru á að dragist inn og hrelli íbúa við sjávarsíðuna á morgun. Þar sem það gerist verður hitastigið ekki til að hrópa húrra fyrir. Næstu daga þar á eftir er áfram útlit fyrir meinhægt veður á landinu,“ segir í hugleiðingum veðurfræðings.

Veðurspáin næstu daga er annars á þessa leið:

Í dag, fimmtudag:

Sunnan 3-10 metrar á sekúndu á Vesturlandi og Vestfjörðum og lítilsháttar væta, en hægari vindur annars staðar og yfirleitt bjartviðri. Hiti í dag frá 10 stigum á Vestfjörðum, upp í 22 stig á Suðausturlandi. Hæg breytileg átt eða hafgola á morgun og léttskýjað, en allvíða líkur á þokulofti við sjávarsíðuna. Áfram hlýtt til landsins, en svalara í þokunni.

Á föstudag:

Hægviðri eða hafgola og víða léttskýjað, en líkur á þokulofti við sjávarsíðuna. Hiti 14 til 21 stig, en svalara í þokunni.

Á laugardag:

Hæg breytileg átt og bjart veður, en sums staðar þokuloft við ströndina og stöku síðdegisskúrir inn til landsins. Hiti breytist lítið.

Á sunnudag:

Hæg norðlæg eða breytileg átt. Skýjað að mestu norðaustantil á landinu og með norðurströndinni og líkur á dálítilli vætu, hiti 7 til 14 stig. Bjartviðri sunnan og vestanlands og hiti að 20 stigum.

Á mánudag:

Austlæg átt 3-10 metrar á sekúndu. Skýjað og lítilsháttar væta austanlands og með suðurströndinni, en þurrt annars staðar. Hiti frá 6 stigum austast, upp í 16 stig í uppsveitum suðvestantil.

Á þriðjudag og miðvikudag:

Fremur hæg austlæg eða breytileg átt. Skýjað með köflum á landinu og þurrt að kalla. Hiti víða 10 til 16 stig yfir daginn.