Ó­venju margir greindust með hettu­sótt í fyrra eða 77 í allt

Óvenjulega margir greindust með hettusótt hér á landi árið 2015, eða alls 77 einstaklingar.

Í farsóttarfréttum landlæknisembættisins segir: „Hettusóttarfaraldurinn hófst í apríl 2015 og náði hámarki í júní það ár. Hvatt var til þess að allir sem fæddir voru eftir 1980 og voru óbólusettir létu bólusetja sig gegn sjúkdóminum. Eftir það fjaraði undan sjúkdóminum og á þessu ári greindist síðasta tilfellið í febrúar 2016.“

Af þeim sem greindust með hettusótt voru langflestir á aldrinum 20-35 ára (meðalaldur 27 ára) og flestir karlmenn (65%).

Um fimmtungur þeirra sem greindust með sjúkdóminn voru með sögu um að minnsta kosti eina bólusetningu gegn hettusótt „og er það í samræmi við fyrri fréttir um að bóluefnið gegn hettusótt veitir minni vernd en bóluefnið gegn mislingum og rauðum hundum, sem er í sömu sprautu,“ segir í fréttinni.

Bólusetning gegn hettusótt hófst hér á landi á árinu 1989 hjá 18 mánaða börnum. Árið 1994 var hafin endurbólusetning hjá níu ára börnum sem var breytt í 12 ára aldur á árinu 2001. Síðasti stóri faraldur af hettusótt var hér á landi árið 1987 en eftir að almenn bólusetning hófst á árinu 1989 hefur sjúkdómurinn lítið greinst.

Hettusótt er bráð og mjög smitandi veirusýking sem leggst oftar á börn en fullorðna. Sýkingin er yfirleitt hættulaus og gengur fljótt yfir en hún er þekkt fyrir að valda alvarlegum fylgikvillum sérstaklega hjá unglingum og fullorðnum. Alvarlegir fylgikvillar geta verið, heilabólga, heyrnarskerðing, bólga í brjóstum, briskirtli, eggjastokkum eða eistum. Bólga í síðast töldu líffærunum getur valdið ófrjósemi. 

Fréttin birtist fyrst í Fréttablaðinu 22. apríl