Erik Olson hættur með FSU en verður áfram á Íslandi

Bandaríkjamaðurinn Erik Olson hefur ákveðið að hætta þjálfun FSu en hann hefur verið með liðið undanfarin fjögur ár. Olson er ekki á förum frá Íslandi, allavega ekki strax.

„Ég verð þó áfram á Íslandi og er spenntur fyrir sumrinu með U20 ára landsliði Íslands og spenntur fyrir því hvaða tækifæri skjóti upp kollinum næst og hvar," sagði Erik Olson í samtali við Karfan.is.

Erik Olson byggði upp flott körfuboltalið á Selfossi sem vann sér sæti í Domino´s deildinni á hans þriðja árið. Liðið átti frábært undirbúningstímabil en varð á endanum að sætta sig við fall í 1. deildina.

„Ég stíg stoltur frá borði hjá FSu og stoltur af þeim hlutum sem við náðum að afreka, “ sagði Olson í fyrrnefndu viðtali við karfan.is.

FSu bætti sigurhlutfall og/eða sæti sitt á fyrstu þremur árum liðsins undir stjórn Erik Olson en liðið náði bara að vinna 3 af 22 leikjum í Domino´s deildinni í vetur.

Þar munaði mestu um það að FSu-liðið vann ekki einn einasta heimaleik allt tímabilið sem er allt annað en vænlegt til árangurs fyrir nýliða í úrvalsdeildinni.