Gráa hárið víkur fyrir kopartónum

Á dögunum stóð Halldór Jónsson heildverslun fyrir frábærri hársýningu Wella Professionals. Þeir Pepe Hell og Juhani Pennala frá Wella Professionals í Finnlandi, komu og kynntu það nýjasta í hártískunni fyrir vor og sumar 2016.

„Nú munum við kveðja Ombre og Balayage og bjóða Ecaille velkomið. Ecaille er litatækni sem gefur hárinu náttúrulegt flæði og hreyfingu. Fallegir mokka, gylltir og kopartónar eru áberandi í sumar og þessir miklu gráu tónar detta út,“ segir Anika Lind Björnsdóttir, söluráðgjafi hjá Halldóri Jónssyni

„Strákarnir héldu stórkostlega sýningu fyrir íslenskt fagfólk og sýndu þeim hvernig Ecaille byggist upp og um hvað þessi litatækni snýst. Ef við ímyndum okkur skjaldbökuskel, þá er enginn rammi með eins mynstri. Það er hugmyndafræðin á bakvið Ecaille. Við röðum litunum bæði lóðrétt og lárétt, sem gefur okkur þessa náttúrulegu hreyfingu. En þar sem Ecaille hefur fram yfir Ombre og Balayage er að möguleikarnir eru endalausir. Hugmyndaflugið fær að njóta sín og hver fagmaður setur sitt „touch“ á útkomuna,“ segir Anika, sátt eftir velheppnaða sýningu.