Zaventem-flugvöllurinn opnaður á morgun

Flugvallarstjóri Zaventem-flugstöðvarinnar í Brussel segir að flugstöðin verði opnuð aftur að hluta til á morgun, sunnudag.

Þetta kom fram í máli hans á blaðamannfundi sem haldin var nú fyrir skömmu á hóteli skammt frá flugvellinum.

Fyrstu þrjú flugin frá vellinum verða á vegum Brussels Airlines, stærsta flugfélagi Belgíu, til Faró í Portúgal, Túrín á Ítalíu og Aþenu í Grikklandi.

Sjá einnig: Sprengingar á flugvelli og lestarstöð í Brussel

Á fundinum sagði flugvallarstjórinn, Arnaud Feist, að hann vonist einnig til að völlurinn verði kominn aftur með hámarksafkastagetu fyrir lok júnímánaðar en þá er ferðamannastraumurinn mestur til landsins.

Jafnframt sagði Feist að nú sem áður væri öryggi farþega forgangsmál hjá stjórnendum flugvallarins og að gripið verði til margvíslegra aðgerða til að reyna auka það enn fremur.

Völlurinn hefur verið lokaður frá 22. mars síðastliðnum eftir að tveir karlmenn sprengdu sig þar í loft upp. 16 manns létu lífið í árásinni.