Fjármálaráðherra segir stöðu Borgunarmálsins mjög alvarlega

Bjarni Benediktsson fjármálaráðherra segir að sú staða sem upp sé komin í Borgunarmálinu sé alvarleg og ætla megi að það verð sem Landsbankinn fékk fyrir eignarhlut sinn í Borgun hafi verið mun lægra en eðlilegt getur talist.

Þetta kemur fram í bréfi sem fjármálaráðherra sendi í dag til stjórnar Bankasýslu ríkisins vegna umræðu um sölu Landsbankans á hlut hans í greiðslumiðlunarfyrirtækinu Borgun.

Sjá einnig: Landsbanki hafnar ásökunum um óheilindi við söluna á Borgun

Í bréfinu segir að samkvæmt upplýsingum og gögnum sem vísað hefur verið til í umræðu um Borgunarmálið megi ætla að það verð sem bankinn fékk fyrir eignarhlut sinn hafi verið mun lægra en eðlilegt getur talist. Í ljósi þeirrar gagnrýni sem sölumeðferð Landsbankans á Borgun hafi sætt sé ljóst að sú staða sem upp er komin sé alvarleg.

Landsbankinn seldi rúmlega þrjátíu prósenta hlut í Borgun fyrir 2,2 milljarða til stjórnenda og hóps fjárfesta árið 2014 en salan hefur sætt talsverðri gagnrýni að undanförnu. Hluturinn var ekki boðinn út og því ekki á allra færi að bjóða í hann.

Nauðsynlegt að tryggja traust til Landsbankans áður en lengra er haldið í söluferli bankans

Telur ráðherra að umræða undanfarinna vikna vegna sölu Landsbankans á hlut sínum í Borgun sé til þess fallin að skaða Landsbankann en stefnt er að því að selja allt að 28,2% hlut ríkisins í Landsbankanum á fyrsta ársfjórðungi þessa árs.

Telur hann því nauðsynlegt áður en lengra er haldið í því söluferli að hvaðeina er máli skiptir og varðar sölu Landsbankans á Borgun verði upplýst og málið afgreitt með þeim hætti að traust til bankans og stjórnenda hans verði tryggt.

Sjá einnig: Borgun metin á allt að 26 milljarða

Stefnt að endurskoðun eigendastefnu

Vitnað er til þess að fjármálaráðherra sé ætlað að setja félögum í ríkiseigu eigendastefnu. Kjarni stefnunnar byggir á að umrædd fjármálafyrirtæki séu rekin með faglegum og gagnsæjum hætti þannig að almennt ríki traust á stjórn og starfsemi.

Í bréfinu segir að í eigendastefnunni er sérstaklega áskilið að fjármálafyrirtæki skuli koma sér upp innri verkferlum um lykilþætti í starfsemi sinni, þar með tölu sölu eigna og að mikilvægt sé að slíkir ferlar séu skilvirkir og gagnsæir.

Sjá einnig: Landsbankinn hafði allar upplýsingar um Borgun samkvæmt Borgun

Jafnframt er sagt að í fjármála- og efnahagsráðuneytinu hafi farið fram endurskoðun á eigendastefnu ríkisins fyrir fjármálafyrirtæki og er þar m.a. gert ráð fyrir að hert verði á kröfum við sölu á eignum þeirra fjármálafyrirtækja sem stefnan nær til.

Bréf fjármálaráðherra til Bankasýslu ríkisins má lesa hér.