Dansandi ferðamenn á ísjökum í kynningarmyndbandi Inspired by Iceland

Í kynningarmyndbandi sem framleitt var í tengslum við markaðsherferðina Inspired by Iceland, sjást ferðamenn dansa á ísjökum á lóni sem er ekki svo ósvipað Jökulsárlóni, en frumkvæði að herferðinni hafði samráðsvettvangur stjórnvalda og ferðaþjónustunnar.

Skot af dansi úti á jökunum sjást tvisvar í myndbandinu en það vakti mikla athygli þegar það kom út fyrir nokkrum árum. Myndbandið má sjá hér að neðan en umrædd skot eru á sekúndu 30 og sekúndu 59.

Inspired by Iceland from MaddMultimedia.com on Vimeo.

Mikið hefur verið rætt um öryggi ferðamanna hér á landi undanfarin misseri en á þessu ári hafa tveir ferðamenn látist af slysförum, annars vegar í köfunarslysi í Silfru í janúar og hins vegar í Reynisfjöru í síðustu viku. Þá var óttast um 40-50 ferðamenn sem gengu fleiri hundruð metra út á ísjaka í Jökulsárlóni í gær til að komast nær selaþyrpingu.

Sjá einnig: Myndskeið frá Jökulsárlóni: „Tifandi tímasprengja“

Friðrik Jónas Friðriksson, formaður svæðistjórnar Björgunarsveitar Hornafjarðar, sagði í samtali við fréttastofu að fólkið hefði hvorki verið hrætt né skammast sín fyrir uppátækið en ekki þarf að fjölyrða mikið um það að það er háskaleikur að fara út á ísinn.

Engin viðvörunarskilti eru þó við lónið sem vara ferðamenn við því hversu hættulegt það getur verið að labba út á ísjakana. Það þarf því ekki að koma sérstaklega á óvart að einhverjir ferðamenn geri slíkt, ekki síst ef það hefur kannski séð kynningarmyndband um Ísland þar sem fólk dansar úti á ísjaka.

Átti að draga úr neikvæðum áhrifum vegna eldgossins í Eyjafjallajökli

Inspired by Iceland-herferðin var kynnt þann 21. maí 2010. Eins og segir í frétt á vef Ferðamálastofu um herferðina var átakinu ætlað að draga úr neikvæðum áhrifum vegna eldgossins í Eyjafjallajökli sem hófst þann 14. apríl 2010 og lauk 23. maí sama ár.

Aska úr gosinu dreifðist um alla Evrópu og gerði það að verkum að flugumferð raskaðist mjög mikið. Í mörgum löndum lögðust flugsamgöngur alveg af dögum saman vegna öskunnar með tilheyrandi óánægju flugfarþega sem sumir hverjir sögðust í sjónvarpsviðtölum hata Ísland. Inspired by Iceland átti að styrkja ímynd Íslands í kjölfar eldgossins og skapa tækifæri úr þeirri miklu umfjöllun sem landið fékk í erlendum fjölmiðlum vegna Eyjafjallajökuls.

Kenna ábyrga hegðun á Íslandi

Segja má að mikil fjölgun ferðamanna síðastliðin ár sé til marks um að herferðin Inspired by Iceland hafi gengið vel þó fleiri þættir hafi án efa einnig haft áhrif á fjölgunina. Ferðaþjónustan er þannig orðin ein mikilvægasta atvinnugrein þjóðarinnar en mjög hefur verið gagnrýnt að innviðauppbygging í greininni hafi ekki fylgt fjölguninni. Það sjáist til að mynda í því að öryggisráðstöfunum sé víða ábótavant auk þess sem aðilum í greininni hefur orðið tíðrætt um það að auka þurfi fræðslu og forvarnir fyrir ferðamenn.

Ný markaðsherferð Íslandsstofu miðar einmitt að því auka fræðslu við ferðamenn hérlendis og heitir Iceland Academy. Herferðin er frábrugðin öðrum markaðsherferðum þar sem áherslan hefur verið á að minnka árstíðasveiflur og fleira í þeim dúr en nú var ákveðið að fara þá leið að kenna ábyrga hegðun á Íslandi, og kannski ekki að ástæðulausu.

Uppfært kl. 14.45: Í fyrri útgáfu þessarar fréttar var sagt að Inspired by Iceland hafi verið markaðsátak Ferðamálastofu en það er ekki rétt og hefur nú verið lagfært.