Innblásin af tónskáldinu Biber

Flytjendur á tónleikum í Akureyrarkirkju á sunnudaginn eru fiðluleikararnir Marie Rouquié og Gabriel Grosbard, sellóleikarinn Steinunn Arnbjörg Stefánsdóttir og virginalistinn Joseph Rassam. Þau kalla sig Corpo di Strumenti og munu leika fiðlusónötur tékknesk-austurríska tónskáldsins Heinrich Ignaz Franz von Biber.

Gabriel, Marie, Joseph og Steinunn eru öll búsett í Frakklandi. Þau komu úr tveimur áttum, frá Lyon og París, og sameinuðust á orgelverkstæði í Alsace til að kljást við fiðlusónötur Bibers. Síðan hafa þau leikið þær í þrígang austast og vestast í Frakklandi og nú liggur leið þeirra um Ísland áður en Frakklandsævintýrið heldur áfram.

Tónleikarnir á sunnudaginn eru þeir síðustu í röðinni Sumartónleikar í Akureyrarkirkju og hefjast klukkan 17.