Kýs að hnýta flugur með konum

„Mér finnst skemmtilegast að kenna konum að hnýta, og vil fá fleiri konur inn í stangaveiðina. Þess vegna legg ég áherslu á námskeið fyrir konur og hef haldið slík námskeið um allan heim,“ segir Hans van Klinken, einn þekktasti veiðiblaðamaður heims, sem dvelur hér á landi. Hann skrifar reglulega pistla sem birtir eru í mörgum helstu miðlum stangaveiðimanna í þremur heimsálfum.

Van Klinken er hér á vegum Íslandsdeildar Continental Trout Conservation Fund, félagsskapar sem hefur unnið gott starf við að kynna þær áskoranir sem fylgja veiðum í Þingvallavatni og verndun hins einstaka urriðakyns sem vatnið hefur að geyma, ísaldarurriðans.

Hafnfirskum, sem og öðrum, áhugakonum um fluguhnýtingar og fluguveiði, stendur til boða fluguhnýtinganámskeið í húsakynnum Stangveiðifélags Hafnarfjarðar í dag. Áður en námskeiðið hefst heldur Hans stutt erindi um veiðar og umhverfisvernd.