Óreiða Los Santos aldrei tilkomumeiri eftir hróðuga endurútgáfu á PC

Þrátt fyrir að Grand Theft Auto V sé að verða tveggja ára gamall er hann enn meðal bestu leikja sem í boði eru í dag. Nýverið var leikurinn gefinn út fyrir PC-tölvur, en áður hafði eingöngu verið mögulegt að spila hann í leikjatölvum. Fyrst kom leikurinn út á PS3 og Xbox360, svo var hann endurgerður fyrir nýja kynslóð leikjatölva og er þetta því í þriðja sinn sem leikurinn kemur út. Í hvert sinn sem hann hefur verið gefinn út hefur hann verið endurbættur og nýjum leikkerfum bætt við. Þá hefur grafíkin einnig verið bætt.

Útgáfa leiksins á PC tölvur gerir spilurum einnig kleift að búa til og nota breytingar á leiknum. Strax er búið að gera nokkra flotta svokallaða „modda“ og aðra sem líta út fyrir að vera skemmtilegir, en þjóna kannski ekki miklum tilgangi. Þar má nefna byssur sem skjóta bílum og annan modd þar sem spilarar geta kallað eftir flóðbylgju sem drekkir Los Santos.

Netspilun GTA V er einhver sú skemmtilegast sem fyrirfinnst og þá sérstaklega þegar spilað er með vinunum. Allt að 30 leikmenn geta spilað á sama kortinu. Þar geta þeir rænt verslanir og fyrirtæki og gert margt fleira. Það þarf þó ekki bara að leysa verkefni og fylgja einhverjum leikkerfum eftir. Það er einnig hægt að keyra bara um götur Los Santos og skoða sig um, eða keyra aðra spilara niður.

Ef það er eitthvað sem má gagnrýna GTA fyrir þá er það hve auðveldlega karakterar leiksins geta dottið um koll og hreyfigeta þeirra getur verið takmörkuð. Þeim galla er gerður skil í þessu myndbandi sem ber nafnið: Parkour all the time.

Grand Theft Auto V er, eins og áður hefur komið fram, einn af bestu leikjum okkar tíma. PC útgáfan er jafnframt líklega sú eigulegasta þar sem moddar halda leiknum ferskum og bæta graffík leiksins stöðugt.