Flytja snjó úr Bláfjöllum í bæinn fyrir brettaiðkun

Heimasíðan snowboard.is var opnuð fyrir skemmstu, en tilgangur hennar er að koma til móts við þá sem ekki hafa efni á því að stunda snjóbrettaíþróttina og gera hana þannig aðgengilega fyrir sem flesta.

Til þess að gera þetta mögulegt ætla aðstandendur síðunnar að halda nokkra viðburði í samstarfi við fyrirtæki og aðila sem vilja styrkja málefnið.

„Planið er að flytja snjó úr Bláfjöllum, þar sem líklega verður ekki snjór í bænum, og gera brautir og palla,“ segir Wiktoria Ginter, ein af skipuleggjendum, um fyrsta viðburðinn sem haldinn verður á Arnarhóli þann 23. apríl klukkan 12. Allir eru velkomnir sem hafa áhuga á að prófa snjóbretti og kynna sér íþróttina.

„Þarna verða brettakennarar að leiðbeina, tónlist og matur. Þetta verður eins og stór fjölskyldupiknikk,“ segir hún og hlær. Wiktoria segir marga viðburði vera í bígerð, og nefnir þá meðal annars fría brettakennslu í Bláfjöllum.