Þetta verður geðveikt kvöld í Vegas

„Þetta var frábært að komast þarna inn enda stærsta bardagakvöld ársins hjá UFC,“ segir Gunnar Nelson en hann mun berjast við Englendinginn John Hathaway í Las Vegas þann 11. júlí næstkomandi.

Þetta verður fyrsti bardagi Gunnars í Bandaríkjunum og frábært auglýsingatækifæri fyrir hann þar í landi enda verður áhorf hugsanlega sögulegt enda hefur UFC aldrei haft jafn mikið fyrir því að auglýsa eitt bardagakvöld. Sumir segja að þetta sé stærsta kvöld í sögu UFC.

„Þetta verður geðveikt kvöld og má vel vera að þetta sé það stærsta frá upphafi. Ég hafði mikinn áhuga á að komast þarna inn og minntist á það við Dana White [forseta UFC] fyrir löngu og hann sagði strax já. Þá var bara spurning hvenær þetta yrði opinbert og gegn hverjum ég myndi berjast.“

Það verður tekið vel á því næstu vikur og Gunnar ætlar að mæta snemma til Bandaríkjanna í undirbúninginn.

„Ég fer örugglega út til Vegas í byrjun maí og verð fram yfir bardagann. Við verðum í einhverju húsi og með eigin æfingaaðstöðu. Þetta er mjög fínt og gott að ná góðum æfingabúðum fyrir bardagann,“ segir Gunnar og bætir við að það verði um tíu manns í æfingahópnum.

Mun reyna að róa Conor

Þar verða strákar sem Gunnar hefur æft með í Dublin meðal annars. Þar á meðal er Conor McGregor en hann er aðalnúmerið á bardagakvöldinu í Vegas og berst um titilinn í fjaðurvigt við Jose Aldo.

„Það er flott mál og þetta verður gaman,“ segir Gunnar en mun hann eitthvað reyna að róa hinn æsta vélbyssukjaft frá Írlandi niður? „Ég reyni að slaka hann eitthvað niður. Sprauta hann með einhverju,“ segir Gunnar léttur.

Andstæðingur Gunnars er 27 ára gamall og með árangurinn 17-2. Hann hefur aftur á móti lítið keppt síðustu ár vegna veikinda en hann greindist með Crohns-sjúkdóm, eða svæðisgarnabólgu.

Hann keppti síðast fyrir 13 mánuðum og tapaði þá fyrir Dong Hyun Kim. Síðasti sigur kappans kom í lok september árið 2012. Hathaway hefur aftur á móti náð heilsu á ný og mun vafalítið mæta beittur í búrið gegn Gunnari.

„Ég hef fylgst með þessum strák lengi og hann er helvíti öflugur og verðugur andstæðingur. Hann hefur sigrað marga góða menn í UFC og er aðeins með tvö töp á bakinu. Þetta er alvöru nagli,“ segir Gunnar en Hathaway hefur meðal annars haft betur gegn Rick Story sem Gunnar tapaði fyrir á síðasta ári. Sá bardagi fór fram fyrir sex árum.

Englendingurinn er talsvert hávaxnari en Gunnar og með lengri faðm. Það er eitthvað sem Gunnar þekkir vel og kemur honum ekki úr jafnvægi.

„Þetta er alltaf voðalega svipað hjá mér. Ég mun æfa gegn skrokkum sem eru svipaðir og Hathaway. Undirbúningur verður því svipaður og oft áður. Ég mun alltaf halda minni áætlun í búrinu og bregðast við aðstæðum hverju sinni. Ég veit hvernig hann er og hann á ekki að geta komið mér á óvart,“ segir Gunnar en hann býst ekki við því að bardaginn fari mikið fram í gólfinu. „Ég efast um að hann vilji fara í gólfið með mér en ég mun rífa hann í jörðina um leið og tækifæri gefst til.“

Var ekki nógu góður gegn Story

Gunnar tapaði frekar óvænt síðasta bardaga sínum í október á síðasta ári. Bardaginn, sem var gegn Rick Story, fór í fimm lotur og tveir dómarar af þremur dæmdu Story sigur. Telur Gunnar sig hafa eitthvað að sanna eftir tapið í Stokkhólmi?

„Allir bardagar eru þannig. Maður fer í hvern bardaga til þess að klára dæmið og gera það almennilega,“ segir Gunnar en hann telur sig hafa lært mikið af bardaganum gegn Story.

„Ég vil meina að almennt hafi ég einfaldlega ekki verið nógu góður í þeim bardaga. Ég var svolítið stífur og ekki að hreyfa mig eins frjálst og ég er vanur að gera. Ég hef lent í því áður en unnið og komist upp með það. Þarna gekk það ekki og þá lærir maður og sér hvað það er sem getur þvælst fyrir manni,“ segir Gunnar en fyrir vikið mun hann mæta beittari en áður í búrið í Las Vegas. „Ég verð í mínu allra besta formi og reynslunni ríkari.“