Alltaf nýtt og nýtt efni

„Þrátt fyrir að ævi Mozarts væri stutt er höfundarverk hans svo stórt að það er nær ótæmandi sjóður. Því getum við alltaf flutt nýtt og nýtt efni fyrir kammersveit á þessum afmælistónleikum,“ segir Laufey Sigurðardóttir umsjónarmaður tónleika sem haldnir verða á Kjarvalsstöðum á morgun, þriðjudag,  í boði Reykjavíkurborgar. Hefð er komin á slíkan viðburð á fæðingardegi tónskáldsins.



Á efnisskránni eru tvær sónötur fyrir píanó og fiðlu, sönglög og endað á Exultate Jubilate.

Flytjendur eru þau Þóra Einarsdóttir sópran, Björn Jónsson tenór, Laufey Sigurðardóttir á fiðlu og Aladár Rácz á píanó. Atli Heimir Sveinsson tónskáld fjallar um Mozart og tónlistina sem flutt verður.

Tónleikarnir hefjast klukkan 18 á morgun og aðgangur er ókeypis.