Nico Rosberg á Mercedes kom fyrstur í mark í síðustu keppni tímabilsins. Lewis Hamilton varð annar á Mercedes og Kimi Raikkonen varð þriðji á Ferrari.
Rosberg var á ráspól og hélt forystunni mest alla keppnina. Hamilton reyndi allgt hvað hann gat, aðra keppnisáætlun þar á meðal en Rosberg var ekki í þeim gírnum að gefa fyrsta sætið upp á bátinn. Rosberg hefur aldrei áður unnið þrjár keppnir í röð.
Rosberg hélt fyrsta sætinu í ræsingunni, Hamilton sat aðeins eftir og þurfti að verja stöðu sína fyrir Raikkonen og Sergio Perez.
Pastor Maldonado á Lotus lenti í samstuði við Fernando Alonso á McLaren á fyrsta hring. Maldonado gat ekki haldið áfram, Alonso gat haldið áfram en þurfti nýjan framvæng. Maldonado var þó ekki um að kenna í þetta skipti. Alonso fékk refsingu, hann þurfti að keyra í gegnum þjónustusvæðið.
Valtteri Bottas tók þjónustuhlé og var hleypt út í umferð á þjónustusvæðinu. Bottas braut framvænginn sinn á hægra afturdekkinu á bíl Button. Bottas þurfti að koma inn á næsta hring til að fá nýjan framvæng. Bottas fékk fimm sekúndna refsingu fyrir atvikið.
Eftir fyrstu þjónustuhléin var Sebastian Vettel orðinn annar á Ferrari á milli Rosberg sem var fyrstur og Hamilton í þriðja sæti. Vettel hafði ekki stoppað en ræsti 15. og gat því valið dekk til að byrja á.
Vettel tók sitt fyrsta þjónustuhlé á hring 23. Hann kom út í sjötta sæti. Hann var þá kominn í góða stöðu fyrir slaginn sem koma skyldi.
Hamilton gaf í um miðbik keppninnar, hann hafði mest verið rúmega sex sekúndum á eftir Rosberg. Minnst varð bilið tæp ein og hálf sekúnda.
Rosberg tók þjónustuhlé á undan og var þá á ferskari dekkjum. Hamilton var á undan á brautinni en var að tapa tíma gagnvart Rosberg.
Vettel fékk ofurmjúku dekkin undir á 40. hring. Hann tapaði tveimur sætum við að taka þjónustuhléið, hann þurfti að komast fram úr Daniel Ricciardo á Red Bull og Perez á Force India til að ná fjórða sætinu aftur. Hann komst þangað á hring 45.
Hamilton tók þjónustuhlé á hring 42, töluvert seinna en Rosberg. Hamilton gaf allt í botn og var 12 sekúndum á eftir Rosberg með 12 hringi eftir.
Hamilton reyndi að vinna upp mismuninn en Rosberg svaraði þegar hann var farinn að sjá grilla í Hamilton í speglunum á beinu köflunum.
Hér fyrir neðan má sjá öll helstu úrslit helgarinnar á gagnvirku brautarkorti.
